澳门旅游费用联盟

【美食】澳门居然有马卡龙雪糕 每日新鲜制造 来一口 心情立刻变美

盈聚澳門 2020-02-13 16:01:12

天時暑熱食返個雪糕就最好不過,如果覺得單調,不如試下馬卡龍雪糕啦!小編今次搵嚟一間始創於韓國嘅甜品店Antique介紹畀大家。由店主Queenie將佢從韓國帶嚟本澳,十分愛食馬卡龍嘅佢喺韓國師傅拜師學藝,再嚟開立加盟店。店家嘅馬卡龍同雪糕都係自家每天新鮮製造㗎!

特色馬卡龍雪糕 $48

大大塊馬卡龍中間夾住冷壓雪糕磚,客人可以自選唔同款式嘅馬卡龍同雪糕。馬卡龍款式多,不過就未必日日都有相同款式供應,除咗因為不定期換新圖案或者卡通造型之外,基於每日都係由人手製作。好似呢款夢幻水彩感圖案,想下次食返同呢個一模一樣認真唔容易,顏色上每次都會有唔同變化,充滿神秘感。

特色馬卡龍雪糕 $48

呢款Emoji圖案馬卡龍認真盞鬼,揀個自己常用嘅表情自拍返張做頭像都唔錯啵!中間夾著嘅雪糕都係由店主自家製,而且口味獨特,如乳酪、維他奶、伯爵奶茶、益力多、話梅、抹茶味等等,而外圍食物裝飾配搭亦會因雪糕口味不同而有異。圖中呢個就係乳酪味雪糕,外層包爆炸糖同棉花糖,乳酪味雪糕酸酸甜甜十分醒胃,最啱炎炎夏日品嚐,加上爆炸糖嘅衝擊,好爽呀!!

馬卡龍款式不時更換及推出新款。

馬卡龍 $13

除了核心嘅外圍,即係馬卡龍自己本身重要之外,中間夾心嘅醬料亦可謂係靈魂所在,呢兩個係正常Size嘅Macaron,一個係抹茶醬,另一個係朱古力醬x麥提莎,真係有原粒麥提莎喺入面!另有紅苺、荔枝、榛子味等等。

伯爵奶茶口味笑哈哈雪條 $18

滿頭大汗搞到心情煩躁嗰陣,望到個笑哈哈公仔而且仲係支冰凍雪條,一口咬落去,心情即刻開朗返哂啦!

韓式抹茶刨冰Bingsu $30

玫瑰花型嘅抹茶雪糕放喺刨冰上,配上原粒紅豆爆珠,係視覺同味覺嘅享受!刨冰軟綿入口即溶,而抹茶雪糕則青澀香濃。

韓式士多啤梨刨冰Bingsu $30

士多啤梨牛奶味刨冰搭配爽口彈牙的粒粒魔芋,透心涼呀!

馬卡龍脆脆 $28

令小編諗起……睇波煲劇唔一定花生薯片嘅,原來馬卡龍當零食都得。

店舖位於新橋區的渡船台(渡船街美心餅店對面條巷直入右手邊)。

文:Karen(文章來自開飯喇)